Cwrdd â'r Tîm

Drwy gydol ein bywydau a’n gwaith, rydym wedi gweld a phrofi rhai o’r ffyrdd y mae anghyfiawnder, diffyg cynrychiolaeth o grwpiau sydd wedi’u hymyleiddio’n draddodiadol a dynamig pŵer anwastad yn effeithio ar fynediad i gyfleoedd i bobl brofi byd natur. Rydym yn cydnabod nad yw ein profiadau a’n lleisiau yn gwbl gynrychioliadol o gymunedau sy’n byw yng Nghymru a thu hwnt. Ein dymuniad yw y gallwn, trwy gydweithio a chyd-ddatblygu, helpu i oresgyn anghyfiawnderau’r gorffennol a chreu newid ar gyfer dyfodol y sector cadwraeth a bywydau pobl sy’n byw yng Nghymru. Rydym yn ymroddedig i ysgogi’r newid hwn yn ein gwaith, a ategir gan ffocws gwaith penodol ar amrywiaeth, tegwch a chynhwysiant ac ymrwymiad tîm i gynyddu ein dealltwriaeth o bynciau sy’n ymwneud â chydraddoldeb, amrywiaeth a chynhwysiant. Rydym yn cydnabod y cyfyngiadau yn ein dealltwriaeth o rai o’r materion yr ydym yn gweithio i fynd i’r afael â nhw fel Prosiect SIARC ac yn cydnabod pwysigrwydd cydweithio ar gyfer newid. O’r saith aelod o staff y mae’r datganiad hwn yn eu cynrychioli, mae pump ohonom yn fenywod a dau ohonom yn ddynion; rydym o ethnigrwydd Cymreig a Seisnig gydag unigolion â threftadaeth Gymreig, Seisnig, Albanaidd ac Americanaidd brodorol. Mae gennym oedran cymedrig o 37 (ystod: 28–48). Rhyngom rydym wedi dod i oed mewn lleoliadau gwledig a threfol yn y DU a thramor. Fel rhan o’n tîm, mae aelodau sy’n rhan o’r gymuned LHDTCRhA+ ac aelodau sy’n heterorywiol. O’r saith aelod o staff a gynrychiolir yma, nid oes gan unrhyw aelod o’r tîm unrhyw anableddau neu amhariadau corfforol.

Mae dau ohonom yn siaradwyr Cymraeg rhugl a phump ohonom yn ddysgwyr Cymraeg ac, o fewn y tîm, rydym hefyd yn siarad pum iaith arall yn ogystal â Chymraeg a Saesneg. Ar gyfartaledd, rydym wedi treulio 47% o’n bywydau rhyngom yn byw yng Nghymru, ac mae ein profiadau o fyw a gweithio yng Nghymru wedi dylanwadu’n sylweddol ar ein rhagolygon a’n dulliau o weithio yn y sector amgylcheddol. I bob un ohonom, mae’r môr a’r amgylchedd morol wedi chwarae rhan bwysig drwy gydol ein bywydau, er nad ydym ni i gyd wedi dod i oed ger y môr ac mae datblygiad y cysylltiad hwnnw’n amrywio o ddechrau yn ystod plentyndod i ers dod yn oedolyn. Mae’r cysylltiad hwn yn dylanwadu’n gryf ar y dewisiadau a wnawn heddiw, gan gynnwys ein hangerdd dros ddiogelu a dathlu amgylchedd morol Cymru, a gweithio tuag at fynediad teg i fannau glas i bawb rydym yn gweithio gyda nhw.

Mae’r tîm i gyd wedi cael y fraint o deithio’n rhyngwladol ar draws chwe chyfandir o’r byd rhyngom, gan gynnwys teithio ar gyfer ymchwil, gwyddor cadwraeth, hamdden a newidiadau bywyd. Mae’r cyfleoedd hyn wedi rhoi’r cyfle i ni brofi a dysgu o ddiwylliannau sy’n wahanol i’n diwylliant ni ein hunain a datblygu sgiliau gwahanol ar hyd y blynyddoedd. Mae ein teithiau wedi amlygu lefelau is o ymwybyddiaeth o’r bywyd gwyllt a’r cynefinoedd sydd i’w cael yn yr amgylchedd morol a dŵr croyw yn y DU. Mae’r profiadau hyn wedi atgyfnerthu ymrwymiad a rennir i eirioli dros wella mynediad a chyfleoedd i brofi byd natur yng Nghymru, heb fod angen teithio dramor. O fewn y tîm mae gennym ni chwe gradd BSc, chwe gradd MSc, un radd MA ac un ddoethuriaeth mewn pynciau amgylcheddol. Wrth ddod i oed, rydym wedi dod dan ddylanwad cefndiroedd ein teuluoedd, sy’n cynnwys gweithio yn y sectorau canlynol: amaethyddiaeth, bwyd môr, gweinyddiaeth ac adnoddau dynol, amddiffyn milwrol, twristiaeth, gofal cymdeithasol, iechyd a llesiant, mwyngloddio, ymchwil fiolegol, cyllid, gweithgynhyrchu, addysg a’r cyfryngau. Rhyngom rydym wedi gweithio yn y sectorau lletygarwch, cadwraeth yr amgylchedd a bywyd gwyllt, twristiaeth a hamdden, chwaraeon, gofal anifeiliaid, y diwydiannau creadigol, ymchwil, adeiladu, y cyfryngau, gofal iechyd, manwerthu, digwyddiadau, ffermio, gweithgynhyrchu, plymio a’r gwasanaeth sifil, ac wedi gwirfoddoli i sefydliadau sy’n canolbwyntio ar yr amgylchedd a chadwraeth bywyd gwyllt, gofal anifeiliaid, ymchwil wyddonol, cymorth i blant ac oedolion sy’n agored i niwed, a chymorth i ffoaduriaid, mudwyr a cheiswyr lloches.

Rydym yn cydnabod y fraint y mae ein cefndiroedd wedi’i rhoi inni, fel yr amlinellir yma, a gwyddom fel tîm ein bod yn parhau i fod â llawer i’w ddysgu.